- રૂા. ૧૦૦૦ કરોડ સુધીનું ધિરાણ મહિલા જૂથોને આપવાનું આયોજન
- લોન-ધિરાણ માટે સહકારી-સરકારી-ખાનગી બેન્કો- આર.બી.આઇ. માન્ય ધિરાણ સંસ્થાઓને યોજનામાં જોડાવા આહવાન કરતા મુખ્ય મંત્રીશ્રી
- બેન્ક લોનનું વ્યાજ સરકાર ભોગવશે – લોન માટે જરૂરી સ્ટેમ્પ ડયુટીમાં માફી અપાશે
- ગ્રામીણ વિસ્તારોના ૫૦ હજાર – શહેરી વિસ્તારોના ૫૦ હજાર મળી રાજ્યમાં ૧ લાખ મહિલા જૂથની જૂથ દીઠ કુલ ૧૦ લાખ બહેનોને મળશે મુખ્ય મંત્રી મહિલા ઉત્કર્ષ યોજનાનો લાભ
- યોજના માટે ૧૭૫ કરોડ રૂપિયાનું બજેટ મુખ્ય મંત્રીશ્રીએ ફાળવ્યું
- શ્વેતક્રાંતિમાં નારીશક્તિની અગ્રેસરતા પછી હવે નાના-મોટા વ્યવસાય, ગૃહ ઉદ્યોગ, હુન્નર-કૌશલ્યમાં પણ રાજ્યની મહિલા શક્તિને અગ્રેસર બનાવવા મુખ્ય મંત્રીશ્રીની પ્રતિબદ્ધતા
- વધુ પ્રમાણમાં બહેનોના જૂથ યોજનામાં જોડવા જૂથ રચના માટે ક્લસ્ટર કો-ઓર્ડીનેટરને પ્રોત્સાહક સહાય મળશે
- મહિલા કલ્યાણ અને ઉત્કર્ષ ક્ષેત્રે કાર્યરત સ્વૈચ્છિક સેવા સંગઠનોનું યોગદાન પણજૂથ રચના માટે મેળવાશે
- ગ્રામીણ વિસ્તારોમાં ગુજરાત લાઇવલી હૂડ પ્રમોશન કંપની – શહેરી વિસ્તારોમાં ગુજરાત અર્બન લાઇવલી હૂડ મિશન યોજનાના અમલની જવાબદારી
- રાજ્યમાં હાલ ર૭ લાખ માતા-બહેનો સખી મંડળોમાં જોડાઇ પરિવારનો આર્થિક આધાર બની રહી છે
- ર૦૧૯-ર૦ના વર્ષમાં ૪.૫ર લાખ મહિલાઓએ સ્વ સહાય જૂથ ક્રેડીટ લીન્ક અન્વયે ૪ર૮.૭ર કરોડના ધિરાણ-લોન સહાય મેળવ્યા.
મુખ્ય મંત્રી મહિલા ઉત્કર્ષ યોજના અંતર્ગત રાજ્યના ગ્રામીણ ક્ષેત્રમાં ૫૦ હજાર અને શહેરી વિસ્તારમાં ૫૦ હજાર મળી કુલ ૧ લાખ જોઈન્ટ લાયાબિલિટી એન્ડ અર્નિંગ ગ્રુપ-મહિલા જૂથની રચના કરવામાં આવશે.
આવા પ્રત્યેક જૂથમાં ૧૦ મહિલા- માતા બહેનોને સહભાગી બનાવીને સમગ્રતયા ૧૦ લાખ બહેનોને કુલ રૂા. ૧૦૦૦ કરોડ સુધીનું કુલ ધિરાણ-લોન મુખ્યમંત્રી મહિલા ઉત્કર્ષ યોજનામાં તબક્કાવાર આપવાનું આયોજન છે.
રાજ્યની સરકારી બેંકો, સહકારી બેંકો તેમજ ખાનગી બેંકો અને આરબીઆઇ માન્ય ધિરાણ સંસ્થાઓ મારફતે આ મુખ્ય મંત્રી મહિલા ઉત્કર્ષ યોજના તહેત પ્રત્યેક મહિલા જૂથને ૧ લાખ રૂપિયાની લોન ધિરાણ પ્રાપ્ત થઇ શકશે
મુખ્યમંત્રીશ્રીએ આ મહિલા કલ્યાણલક્ષી યોજનામાં બેન્કિંગ સેક્ટરને ઉત્સાહપૂર્વક જોડાવા આહવાન કર્યું છે. રાજ્ય સરકાર આવી બેન્કો સાથે નજીકના ભવિષ્યમાં આ અંગેના MOU પણ કરવાની છે.